Port yn Anelu i Ymateb ym Mhowys

Mae CPD Porthmadog yn teithio i Bowys y penwythnos hwn ar gyfer her anodd yn erbyn Cegidfa, wrth i’r ddau glwb edrych i gryfhau eu safleoedd yn hanner uchaf tabl Cynghrair Novira Cymru North.

Daw’r Port i’r gêm ar gefn dwy golled yn olynol am y tro cyntaf ers peth amser. Daeth y gyntaf yng Nghwpan Cymru yn erbyn Cei Connah, cyn i arweinwyr y gynghrair, Brickfield Rangers, gipio buddugoliaeth o 1-0 ar brynhawn gwlyb a gwyntog ar y Traeth wythnos diwethaf.

Cyn hynny, roedd Porthmadog wedi cael rhediad ragorol, gan gofnodi buddugoliaethau pwysig yn erbyn Y Drenewydd (1-0), Dinas Bangor 1876 (1-0) a Gresford Athletic (1-0). Roedd y canlyniadau hynny’n tynnu sylw at gryfder ac amynedd y garfan, gyda’r amddiffyn yn arbennig yn chwarae rhan allweddol wrth gadw tair gêm gynghrair ddi-ildio yn olynol.

Er bod taith i Bowys bob amser yn brawf anodd, nid yw canlyniadau diweddar y tîm cartref wedi bod mor gyson â’r hyn y maent wedi’i gynhyrchu yn gynharach yn y tymor. Mae Cegidfa wedi casglu dim ond un pwynt o’u dwy gêm gynghrair ddiwethaf, er eu bod wedi cofnodi buddugoliaethau trawiadol yn erbyn Hotspur Caergybi a Llanuwchllyn yn gynharach yn yr ymgyrch.

Fel Porthmadog, daeth taith Cegidfa yng Nghwpan Cymru i ben yn yr ail rownd. Ar ôl gêm ddramatig a orffennodd yn gyfartal 3-3 yn erbyn Coedpoeth, collodd y tîm o Bowys 9-8 ar giciau o’r smotyn. Byddant yn awyddus i ymateb yn gadarnhaol a dychwelyd at fuddugoliaeth ar eu cae eu hunain.

Mae’r ystadegau’n awgrymu gornest agos iawn. Ar hyn o bryd mae Cegidfa yn yr wythfed safle gyda 17 pwynt o 12 gêm, tra bod Porthmadog yn bedwerydd gyda 23 pwynt o’r un nifer o gemau. Mae pob arwydd felly yn awgrymu y bydd hon yn gêm gystadleuol a difyr.